Suportado ni Pangulong Ferdinand Marcos Jr. ang direktiba sa Korte Suprema nga ipasa sa Kongreso ang balaod batok political dynasty, nga usa sa iyang mga priority bills.
Matud ni Palace Press Officer Claire Castro, gusto ni PBBM nga mapasa ang anti-political dynasty law sulod sa iyang termino.
Apan, wala pa maghatag og dugang detalye ang Malacañang tungod kay wala pa niini mabasa ang tibuok desisyon sa Supreme Court. Miingon ang korte nga ang kapakyasan sa Kongreso sa pagtuman sa maong constitutional duty sulod sa 39 ka tuig usa ka “grave abuse of discretion” ug “manifest injustice.”
Naa sa Kongreso ang timetable sa legislative action, sumala kang Castro, samtang giila sa Palasyo nga nag-atiman usab ang mga lawmakers og ubang legislative priorities.
Sa House of Representatives, naaprubahan na sa third and final reading ang bersyon sa anti-political dynasty bill, samtang wala pa mapasar sa Senado ang counterpart measure.
Apil ang maong sugyot sa 24 ka priority bills nga gusto sa administrasyong Marcos nga mapasa ayha ang iyang kataposang State of the Nation Address sa 2027.
Kahinumdoman nga ang Article II, Section 26 sa 1987 Constitution nagmando nga ang Estado kinahanglan magdili sa political dynasties pinaagi sa balaod.
