DAVAO CITY – Nagtuo ang usa ka konsehal ning dakbayan nga mapalabang sa 19th City Council ang pag-ban sa paggamit ug single-use plastics sulod sa ilang termino isip tubag sa nagkataas nga basura sa dakbayan.
Sumala ni Konsehal Diosdado Mahipus Jr.,kinsa chair sa committee on environment and natural resources, nga gi-asikaso na sa iyang komite ang feasibility study aron nga mopanday sa maong ordinansa.
Nagbinantayon sumala pa ang iyang komite sa pagpanday sa sugyot gumikan kay mamahimong makaapekto sab kini sa pipila ka mga sektor ilabi na sa business sectors.
Hinuon gi-angkon sa nahisgutan nga lisud ang pagpatuman sa susama nga ordinansa ilabi na nga paggamit ug plastic ang kabahin sa aktibidad sa katawhan.
Una ng gibutyag sa grupong Interfacing Development Interventions for Sustainability (Idis), nga ang City Environment and Natural Resources Office (Cenro) nakatala sumala pa ug average nga 1,012 tons daily volume sa basura nga mahipus dinhi sa siyudad apan bugtong 29 percent lamang ang nakolekta sa Cenro.
