DAVAO CITY – Nagpadayag ang Davao City Health Office (CHO) ug kabalaka kalabot sa kakulangon karon sa dengue diagnostic test kits, gumikan sa padayon nga pagsaka sa kaso sa dengue dinhi sa siyudad.
Sukad 2015, ang Department of Health (DOH) nagkulang na matud pa ug Dengue NS1 Rapid Diagnostic Test (RDT) kit nga maka-detect sa presensiya sa dengue virus sulod lamang sa 15 minutos bisan nga early stages pa lamang ang balatian.
Apan gibutyag ni CHO Tropical Disease and Control Division Test Control worker Melodina Babante nga halos nagkulang na karon ug RDT kits sa ilang health centers.
Gitataw sab ni Babante nga naka-deliver ang DOH ug halos 600 RDT kits sa CHO sa milabay nga Agosto 1 dayon gihatud kini sa rural health units (RHUs) ug district health centers sa siyudad. Apan sa Agosto 6 ning tuig kasamtangan, anaa na lamang sa 100 test kits ang available.
Naglaom na lamang si Babante nga mahatdan dayon sila ug sobra nga mga supply sa test kits ilabi na nga nagpadayon karon ang pagsaka sa kaso sa dengue.
