DAVAO CITY – Mibati ug kadismaya ang mga investors sa Gambaru Trading & Consultancy human nga nagpadayag ug mensahe ang nagpailang CEO sa kompanya nga si Gualberto Montilla nga walay nahitabong refund sa kuwarta sa pipila ka mga investors sa ilang gisaad nga petsa.
Sa iyang mensahe, nangayo ug pasaylo si Montilla gumikan kay wala niini natuman ang iyang saad nga hinay-hinayan ug balik ang kapital sa ilang mga investors nga sugdan unta sa milabay nga Hulyo 29 subay sa iyang gilagdaan nga undertaking.
Gikanayon sa nahisgutan nga wala sab gituman sa iyang provider ang iyang saad hinungdan nga walay kuwarta nga ma-release aron nga ibalik ngadto sa ilang mga investors.
Tungod sa maong insidente, subli na sab nga nangayo ug pasensiya ang nahisgutan sa ilang mga investors ug mihangyo nga lugwayan pa ang ilang pasensiya.
Nag-agad lamang sab sumala pa siya sa refund nga ihatag sa iyang provider apan wala sab kini mituman sa saad hinungdan nga walay pag-out sa refund nga mahitabo.
Gisaad sab sa nahisgutan nga wala silay plano nga mo-ikyas sa ilang obligasyon sa mga ilang mga investors inay gipangayo lamang nila ang dugang panahon aron nga matuman nila ang iyang gisaad nga ma-refund ang tanan kuwarta sa mga investors.
