DAVAO CITY – Mihangyo si Davao city Mayor Inday Sara Duterte-Carpio sa publiko nga i-report gilayon sa otoridad ilabi na sa National Bureau of Investigation (NBI) kadtong migamit sa iyang pangalan sa bisan unsa man nga aktibidad.
Kahinumduman nga na-alarma ang Mayor human nga gigamit sumala pa ang iyang hulagway sa usa ka on line lending activities.
Tungod niini, gi-alerto karon sa lokal nga kagamhanan ang publiko nga mag-inampingon aron nga dili mailad sa pipila ka mga lending company nga nagbutyag nga suportado ang ilang negosyo sa kagamhanan.
Gibarugan sa Mayor nga wala siya malambigit sa PesosPh ug uban pa nga online lending companies nga nagahanyag ngadto sa publiko alang sa fast cash loans uban sa naghinobra nga mga fees ug interest.
Angayan sumala pa nga dili dayon magpadala sa higayon nga adunay mga tawo grupo o kompanya nga buot makig-transaksiyon ug gamiton ang iyang pangalan sa susama nga negosyo.
Sa kasamtangan, padayon nga gimonitor sa otoridad ang susama nga mga modus ug pagpangilad.
