DAVAO CITY – Gidagsa sa gatusan ka mga investors sa Rigen Marketing ang usa ka gambalay nga nahimutang sa Seminary Drive Tagum City nga gikanayong “hideout” sa mga opisyal sa nahisgutan nga kompaniya.
Kahinumduman nga nakita sumala pa sa mga investors ang sakyanan sa inahan sa CEO sa Rigen, ug uban pang butang sa kompaniya.
Dali nga mipatunga ang mga sakop sa kasundalohan ug kapulisan human nga misulay sumala pa pagsulod ang mga tawo sa maong gambalay.
Nasayran nga daghanang investors ang dismayado ug buot na lamang nga kuhaon ang ilang kapital nga gi-invest sa kompanya human nga pakyas pa gihapon ang Rigen sa ilang saad nga magpahigayon nga “massive pay-out” sa milabay nga Hulyo 9.
Kahinumduman nga subling nag-post ang Rigen sa ilang page nga malangay na sab ang pagpanghatag ug insentibo gumikan kay nagpahigayon sila ug imbestigasyon nga gikalambigitan sa kanhi management.
Daghanan karon sa mga investors sa kompaniya ang nagtuo nga mihimo lamang karon ug pamaagi ang Rigen aron nga mosibat ug dili makahatag ug pay-out.
Apan gibutyag sa kompanya nga ibalik na lamang nila ang kapital sa mga investors sugod Agosto 15, diin himuon sumala pa kini matag Lunes ug Huwebes.
