DAVAO CITY – Mitanyag kagahapong adlawa ang ahensiya sa Department of Public Works and Highways (DPWH)-Davao ug libreng sakay sa mga apektadong residente samtang gitukod ang detour bridge sa Matina Pangi ning dakbayan.
Kahinumduman nga nanawagan karon ang mga residente ug motorista sa lugar nga unta paspasan ang construction sa tulay ilabi na nga sagad sumala pa nga mag-overflow ang Matina Pangi River panahon nga mobundak ang kusog nga ulan.
Gipahimangnoan karon sa DPWH-Davao ang mga residente sa Matina Pangi partikular na sa Kilometer 6 hangtud 9 (Samantha Homes, Grace Park, Gaisano, Saavedra, Iñigo Relocations ug environs) paingon ug gikan sa downtown area nga mosubay sa Catalunan Grande Road gumikan ka gisirad-an karon ang Matina Pangi detour bridge.
Apan usa ka alyas Randy ang nagpasibaw sa iyang kadismaya sanglit mobayad na sila ug P200 ilabi na kung mosubay pa sila sa Catalunan Grande route sakay ang motor.
Sa milabay nga bulan, nagpahimutang DPWH-Davao ug steel bridge isip hulip sa naguba nga Matina Pangi Detour Bridge human nga midahili ang yuta samtang nagpadayon ang konstruksiyon sa Matina Pangi Bridge.
