DAVAO CITY – Dili na gayud kapugngan ang Department of Interior and Local Government (DILG) eleven bisan pa kung dunay ikapakita nga Temporary Restraining Order (TRO) ang Kabus Padatuon (KAPA) Community Ministry International, Inc.
Sumala pa kang Alex Roldan, DILG eleven Director nga kamado-an sa Securities and Exchange Commission (SEC) lamang ang ilang tuohan.
Una nang gi-angkon sa DILG Eleven nga gipangayo-an sila ug panabang sa SEC aron nga ipatuman ang pagpasira sa mga buhatan sa KAPA ubos sa founder niini nga Pastor Joel Apolinario.
Nasayran nga daw wala matarog ang mga membro sa KAPA taliwala sa paglihok na sa Department of Interior and Local Government (DILG), National Bureau of Investigation (NBI) ug Philippine National Police (PNP) nga ipatuman na sa hingpit ang cease and desist order (CDO) batok KAPA.
Una nang gimando-an ang tanan nga mga Local Government Units, PNP. NBI ug BARMM Regional Secretary nga ipatuman ang kamando-an.
Gi-angkon sa DILG – 11 Director Alex Roldan nga dili sila ang nagpasira sa KAPA kundili ang SEC nga nangayo lamang ug tabang sa KAPA aron nga paserhan kini.
‘Dili ang DILG ang mipahunong sa KAPA, kundili ang SEC. Nangayo lamang sila ug tabang sa DILG aron nga epektibo nga ikapatuman ang pagpasira sa mga buhatan sa KAPA.’ Pagtin-aw ni DILG Eleven Director Alex Roldan.
Samtang sumala pa kang Jun Blanco, sakop sa KAPA sa Davao del Sur nga kinahanglan nga tuki-on pag-ayo ang tumong ug tuyo sa KAPA.
Sumala pa kang Blanco nga milampus sila sa pagpalambo sa kinabuhi sa mga kabus, Kini taliwala sa mga pagpanghimaraut ug mga pagsaway batok sa grupo.
‘Nahimong malampuson ang KAPA, taliwala sa mga pagpanghinaway. Sama sa mga pahayag ni KAPA Founder Pastor ug Dr. Joel Apolinario nga kinahanglan ang sugat nga hangin nga mao ang magpalupad pataas sa usa ka tabanog.’ Pahayag ni Jun Blanco sa KAPA sa Davao del Sur.
