Gipangandam sa Solviva Energy, usa ka residential solar firm nga gisuportahan sa Aboitiz Power Corp., ang pagpalapad sa ilang operasyon ngadto sa Cebu ug Davao tungod sa padayong pagsaka sa panginahanglan alang sa rooftop solar.
Matud ni CEO Coby Cobankiat, gikan sa testing phase sulod sa miaging mga tuig, andam na ang kompanya nga moabot sa mas daghang siyudad ug makahatag og dugang produkto alang sa mga panimalay.
Nakaamot sa maong pagpalapad ang bag-ong mga lagda sa Department of Energy nga nagtumong sa pagpahapsay sa proseso sa pag-instalar og solar energy systems sa mga balay ug gagmayng negosyo.
Gikan Marso hangtod Agosto, misaka og 272 porsyento ang inquiries alang sa residential solar packages sa kompanya kumpara sa samang panahon niadtong miaging tuig.
Sumala ni Cobankiat, misamot ang panginahanglan samtang nagpabiling taas ang presyo sa kuryente, ilabina human misaka ang power prices sa spot market tungod sa outages sa dagkong coal plants.
Dugang pa niya, mismo na ang mga konsumante ang nangita og rooftop solar aron makatubag sa taas nga gasto sa kuryente.
Sa pagkakaron, gilauman sa kompanya nga molungtad og mga 25 ka tuig ang ilang solar panels. | VIA BOMBO EROS PAJOTA
