DAVAO CITY – Unom ka adlaw ayha ang ipahigayon nga 2019 midterm elections, sa Mayo 13, gibutyag sa ahensiya sa Commission on election (Comelec) davao region nga 100 porsyento na sila nga andam.
Samtang gibutyag ni Atty. Michael Abas, comelec commissioner, nga dose oras nga abli ang mga polling precinct karong adlaw sa pinili-ay nga magsugod sa alas sais sa buntag hangtud na sa alas sais sa gabii.
Gikatakda sab sumala pa nga ihatud ang mga gamiton nga balota ingon man ang mga Vote Counting Machine (VCM) sa kapin 3,000 ka mga polling precincts latas sa Davao region.
Ayha sumala pa ang adlaw sa pinili-ay, magpahigayon una ug final testing and sealing aron nga masayran kung dili depektoso ang gamiton nga mga makina ug wala pa kini unod.
Gilaoman sab ni Atty. Abas nga makab-ot nila ang 85 porsyento nga turn out sa nagsingabot nga eleksiyon.
Samtang nanawagan sab ang opisyal ngadto sa mga botante nga mas maayong magsayo sa pag-adto sa mga presinto aron nga dali sab sila mahuman sa ilang trabaho ug masugdan gilayon nila ang pag-ihap sa mga boto.
