DAVAO CITY – Gitouhan sa mga tinugyanan sa balaod nga daku ug tabang ang komunidad sa pagsanta sa kaylap nga illegal nga sugal sa pipila ka bahin sa dakbayan.
Kini ang gihatagan ug katin-awan ni PCI Mil Grace Cajes Driz, team leader sa Criminal Investigation and Detection Group (CIDG) eleven human sa ilang ubay-ubay nga anti-illegal gambling operation nga gilusad niining milabay nga semana.
Sumala sa nahisgutan nga opesyal, pinaagi sa tabang sa komunidad sa paghatag ug impormasyon ngadto mismo sa mga otoridad daku matud pa ug ikatabang sa pagpakgang o kaha pagkonhud ug daku sa mga nagkada-iya nga illegal gambling dinhi sa Davao Region.
Subay niini gi-awhag nila ang mga residente sa Davao nga i-report gilayon ngadto sa mga tinugyanan sa balaod ang mga nagkada-iya nga mga illegal gambling nga nahitabo sa ilang tagsa-tagsa ka mga komunidad aron nga dali kini nga ma-respondehan sa kapolisan.
Kini human nga nalusad nila ang nagkada-iya nga mga Anti-illegal gambling operation sa milabay nga semana, diin siyam ang malampuson nga nangadakpan pinasikad sa warrant of arrest may kalabotan sa kaso nga paglapas sa Presidential Decree 1602 kun pagpahamtang ug mas bug-at nga silot alang sa illegal gambling activity nga misangpot sa pagkadakop sa mga suspek sa dapit sa Sta. Ana area uban sa hini-usang pwersa sa CIDG ug sa Sta. Ana PNP.
Nagpa-abot na lamang karon ang mga suspek sa mamahimong kalambu-an sa ilang kasong gi-atubang.
