Gihatagan og pinansyal nga insentibo sa Provincial Government of Davao Oriental ang 442 ka Child Development Workers (CDWs) isip pag-ila sa ilang dedikasyon ug kontribusyon sa pag-atiman ug paghulma sa unang hugna sa edukasyon sa mga kabataan.
Nahimo kini atol sa 8th Child Development Workers and Teachers Provincial Congress 2026 nga gipahigayon niadtong Nobyembre 12, 2026, diin matag usa sa mga CDW nakadawat og performance incentive nga mokabat sa ₱5,000.
Gawas niini, gihatagan usab og ₱3,000 matag usa ang 11 ka municipal ug city Early Childhood Care and Development (ECCD) focal persons, samtang nakadawat og tagsa-tagsa ka ₱5,000 ang 32 ka loyalty awardees isip pag-ila sa ilang dugay nang pagserbisyo.
Dugang pa niini, gihatagan usab og ₱15,000 matag usa ang 12 ka retiradong Child Development Workers isip pasalamat sa ilang mga tuig nga gigahin sa pag-alagad sa kabataan.
Kabahin ang maong kalihokan sa pagsaulog sa 34th National Children’s Month nga nagtigom sa mga CDW gikan sa 11 ka lungsod ug dakbayan sa probinsya.
Gipasiugda ni Governor Nelson L. Dayanghirang nga importante ang pag-ila ug pagsuporta sa mga trabahante nga adunay dakong papel sa paghulma sa pundasyon sa edukasyon ug kaugmaon sa kabataan.
Pinaagi sa maong pagpasidungog, gilauman nga mas madasig ang mga Child Development Workers sa pagpadayon sa ilang serbisyo ug paghatag og dekalidad nga pag-atiman ug pagkat-on sa mga kabataan sa Davao Oriental.
