Gihatagan og libreng serbisyong medikal ang mga probationer, parolee ug ilang mga pamilya pinaagi sa hiniusang inisyatibo sa City Government of the Island Garden City of Samal (IGACOS) ug Samal City Parole and Probation Office.
Gipahigayon ang maong medical mission sa Barangay Kinawitnon Gymnasium sa Babak District diin gitanyag ang nagkadaiyang serbisyo sama sa konsultasyong medikal, dental services, laboratory examination, mobile X-ray ug libreng tambal.
Pinaagi niini, natubag ang pipila sa mga batakang panginahanglan sa panglawas sa mga benepisyaryo, lakip na ang ilang mga sakop sa pamilya nga nakabenepisyo usab sa maong kalihokan.
Kabahin kini sa paningkamot sa lokal nga panggamhanan ug sa Samal City Parole and Probation Office nga suportahan ang rehabilitasyon ug pagbalik sa mga probationer ug parolee sa komunidad.
Gipasiugda usab nga importante ang paghatag og giya, suporta ug access sa batakang serbisyo panglawas aron matabangan ang mga benepisyaryo ug ilang pamilya sa pagtukod pag-usab sa ilang kinabuhi ug aktibong pag-apil sa komunidad.
