DAVAO CITY – Magpabilin si Bai Halila Sudagar isip IP Representantive sa Konseho, ning dakbayan sa Davao.
Subay niini mitambong si Sudagar sa Pulong-pulong ni Polong ug sa sesyon sa konseho kaganinang buntag.
Kini isip pagpadayon sa iyang pagpangatungdanan isip IP Mandatory Representative sa dakbayan sa Davao human nga mipagula ug certificate of hold over sa kampo ni Sudgar ang National Commission On Indigenous People (NCIP) Eleven kagahapong adlawa.
Pinasikad sa certificate of IPMR hold-over nga gilagdaan ni NCIP eleven Director Atty. Geroncio Aguio magpabilin isip IP Mandatory Representative si Sudagar hangtud sa Nobyembre 30, 2018 o hangtud nga duna na’y mapili nga mopuli kaniya.
Kahinumduman nga niadtong Hunyo 30, natapus ang termino ni Sudagar isip IPMR ug napili nga mopuli unta kaniya si Cherry Ann Codilla, kinsa gikan sa tribu nga Bagobo Klata, apan wala kini na-aprobahan sa NCIP eleven nga wala mipagula ug certificate of affimation gumikan kay wala maka-abot ug baynte singko porsento ang dugo ni Codilla isip sakop sa tribong Bagobo Klata, subay sa geneology niini.
Sa kasamtangan nagpadayon pa ang selection process alang sa mosunod nga IP mandatory representative sa dakbayan.
