DAVAO CITY – Personal nga kasuko ang usa sa gitutukan karon nga hinungdan sa pagpusil patay sa kanhi pulis sa Sta. Maria Davao Occidental.
Una ng naila ang biktima nga si Retired SPO4 Epipanio Cumabig, 64 anyos, residente sa Sitio Sulop Brgy. Panglad Sta. Maria Davao Occidental.
Sa imbestigasyon sa kapulisan, nag-angkas lamang sa habal-habal ang biktima human nga mitambong kini sa ilang meeting sa senior citizen dihang gitaparan kini sa laing motorsiklo diin usa sa mga sakay niini ang mipusil sa biktima sulod sa pipila ka higayon.
Nahagbong sumala pa si Cumabig sa motor samtang ang driver niini ang dali nga nangayo ug pakitabang.
Human ang insidente, paspas nga misibat ang mga mamumuno sa wala matino nga direksiyon.
Gisulayan pa pagdala sa ospital ang biktima apan tungod sa daghanang samad pinusilan nga naangkon niini, gideklara kining dead on arrival sa mga doktor.
Nakuha sa crime scene ang 3 ka mga balines ug lima ka mga basiyo sa bala nga iya sa .45 nga armas.
Gipalawman pa karon sa kapulisan ang imbestigasyon aron nga daling mailhan ang mga mipaluyo sa krimen.
