DAVAO CITY – Napalabang na sa City Council ang resolusyon nga nag-amyenda sa lokasyon ingon man kantidad sa itukod nga bag-ong gambalay sa City Health Office (CHO) building.
Gi-aprubahan sa konsehal ang igahin nga budget diin gikan sa P25 million himuon na kining P60 million ug ibalhin sab ang lokasyon gikan sa may Davao City Recreation Center paingon sa A. Pichon Street sa Magallanes.
Matud pa kang City Health Office head Josephine Villafuerte nga ang nahisgutan nga gambalay adunay unom ka andanas ug adunay roof deck aron nga ilakip ang green building practices.
Hatagan ug kopya sa gi-aprubahan nga resolusyon ang mga miyembro sa City Development Council, City Engineer’s Office, City Planning’s Office, City Mayor’s Office, Vice Mayor’s Office, tanan nga buhatan sa Davao City Council ug uban pa nga mga departamento.
Sa milabay nga bulan, nangayo si Mayor Sara Duterte-Carpio ug permiso sa city council nga lagdaan ang kasabutan tali sa Department of Health (DOH) alang sa P60 million CHO building.
Magsugod sumala pa ang pagtukod niini sa mosunod nga duruha ka tuig.
