DAVAO CITY – Gitataw sa mga opesyal sa Maragusan, Compostela Valley Province nga wala sila magkulang ug pahinumdum ngadto sa mga residente sa Purok Bulawanon, Barangay Tandik gumikan sa nakita nga liki sa bukid.
Kini ang gihatagan ug katin-awan ni Municipal Information Officer (MIO) Noli Tangguyok uban sa pgkanayon nga bisan atol pa sa pagkuso-kuso sa bagyong Vinta niadtong Desyembre nagpahimangno na silang daan sa mga residente nga anaa sa tiilan sa mga kabukiran nga mohiklin sa luwas nga mga lugar sa kabalaka nga maigo sa modahili nga yuta.
Kalakip sa ilang gipasidan-an ang mga biktima.
Una na nga mipasalig ug tabang ang konseho sa Barangay Tandik, Maragusan, Compostela Valley Province alang sa mga nangamatyan.
Ang biktima nga si Ramon Magallanes, usa ka mag-uuma apan naga-sideline sab isip abantero sa mga minahan.
