DAVAO CITY – Giklaro sa Social Security System (SSS) Davao nga wala pay nahitabong pag-usbaw sa kontribusyon sa ilang mga miyembro.
Kini ang gibutyag ni Mario Daray ang info officer sa SSS-Davao.
Sumala pa sa nahisgutan nga nagpabilin gihapon sa 11% sa monthly income ang kontribusyon sa mga miyembro.
Laraw usab sumala pa sa SSS nga usbawan kini niadtong Mayo 2017 apan wala pa mapatuman hangtud sa pagkakaron gumikan sa mga proseso nga agian niini.
Ugaling mahinayon ang pag-usbaw, laraw sa SSS nga mudugang og 1.5% ug mamahimo na kining 12.5% apan sumala ni Daray nga paniguradong kaya na kini sa mga trabante ug employer gumikan usab sa ipatuman nga tax reform law.
Dili usab sumala pa sayon ang pagpausbaw sa kontribusyon tungod muagi pa kini sa consultation sa mga sectoral groups, diliberasyon sa Kongreso, padulong pa sa Senado ug kinatapusan ang pag-aproba ni Pangulong Rodrigo Duterte.
Wala pa usab masayod si Daray kung mahitabo ba kini karong tuiga.
Giklaro usab ni Daray nga bisan ug dili mahinayon ang increase karong tuiga kaya pa SSS nga mulungtad sa ilang operasyon.
