DAVAO CITY – Gisubay na karon sa otoridad ang gikanayong kaso sa pagpangidnap sa ka otso anyos nga bata nga gikanayong na-rescue sa Bago Aplaya, ning dakbayan sa Davao.
Sumala pa kang Talomo Police Station Chief Police Chief Inspector Oliver Navales, padayon pa nila nga verify ang detalye kung tinuod o dili ang gihatag nga pahayag sa bata.
Gitataw sab sa opisyal nga walay police report nga giduso sa susama nga insidente apan gipahimangnoan niya ang iyang mga personahe nga subayon ang sitwasyon.
Una ng gi-post sa Davao City Public Inquiry Page, na usa ka otso anyos ang naluwas sa mga barangay tanod ug gisaysay sa maong bata nga mga armadong lalaki ang misulay pagkidnap ug mipugos kaniya pagpasulod sa itom nga sakyanan diin aduna sumala pay duruha ka batang lalaki ug babaye sa sulod niini.
Apan nakahimo matud pa pagsibat ang mga bata gikan sa mga abductors nga maoy hinungdan nga na-trauma kini.
Sumala sa usa ka Concerned citizens, namatikdan nga mitago likod sa usa ka truck sa Gulfview area ning siyudad ang bata ayha gi-turn over sa Barangay Talomo.
Nasayran ni Navales nga pinasikad sa ilang inisyal nga imbestigasyon, ilado matud pa ang maong bata sa ilang Barangay nga nagalatagaw.
