DAVAO CITY – Magpadayon ang ipahigayon nga Lambat Bitag sa mga sakop sa otoridad aron pangsikupon kadtong mga malapason sa balaud.
Kahinumduman nga kagahapong adlawa, dungan nga naglusad ug operasyon ang mga ahensiya sa Land Transportation Office (LTO), Traffic Group, CTTMO/TMC, DCPSC ug mga personahe sa TF Davao sa upat ka mga strategic areas sa Matina Aplaya, Matina Pangi, Central Park ug Puan nga miresulta sa pagkasikop sa mga malapason sa RA 4136.
Mikabat sa 25 ka mga violators ang na-isyuhan ug TOP ug anaa sa 19 ka mga units sa motorsiklo ang gi-impound.
Matud pa kang Police Chief Inspector Oliver Navales ang Station Commander sa Talomo PNP nga ayha gipahigayon ang deployment sa iyang mga sakop, gipahimangnoan niya ang mga nahisgutan nga kinahanglan nahasubay sa gimbut-an sa balaud ang pagpatuman sa operasyon aron nga masiguro ang kalidad sa serbisyo nga gipatuman sa Talomo PNP Unit.
Samtang una ng nasayran kang Supt. Ernesto Castillo, hepe sa Traffic Group nga sagad sumala pa sa mga malapason ang wala suot nga helmet, walay side mirror ang motorsiklo, walay rehistro ug daghanan pa.
Kagahapong adlawa, anaa sa kapin 100 ang na-impound nga mga unit samtang kapin 300 usa ka mga driver ang na-isyuhan ug TOP.
