DAVAO CITY – Subling nagpahimangno ang Davao City Water District (DCWD) sa ilang mga konsumante kalabot sa laing tulo ka schedule sa water service interruption.
Ipatuman sumala pa kini aron nga mas mapalambo pa ang ilang ipatuman nga mga proyekto.
Ang unang set ipatuman sa Hulyo 13 sugod alas 9 sa buntag hangtud na sa alas 4:00 sa hapon diin maapektohan niini ang pipila ka areas sa Maa partikular na ang Datu Luho Village, Marañon Compound, DAR Village, JPMI Subd., ug Spring Village.
Kinahanglan sumala pa nga ipatuman ang water service interruption alang sa tapping ug looping sa bag-ong ipahimutang nga tubo aron nga mapalambo ang mainline sa Purok 44, Marañon Compound DatuLuho Street, Brgy. Ma-a.
Ang ikaduhang set ipatuman sa Hulyo 13 sugod alas nuebe sa buntag hangtud na sa alas kuwatro sa hapon diin maapektohan niini ang pipila ka mga area sa Bago Aplaya.
Samtang ang ikatulong set ipatuman sa Hulyo 14 sugod alas nuebe sa buntag hangtud alas kuwatro sa hapon diin maapektohan niini ang pipila ka mga lugar nga sakop sa Lizada, Toril.
Ang nahisgutan nga water service interruption ipatuman aron pag-tap sa bag-ong tubo aron nga mas mapalambo pa ang mainline sa may Kasama Village sa Lizada, Toril.
Nangayo karon ug pagsabot ang kadumalahan sa DCWD ngadto sa mga maapektohan nga mga konsumante dungan sa pasalig nga ibalik gilayon nila ang supply sa tubig sa higayon nga matapos ug sayo ang pagkumpuni sa mga tubo.
