DAVAO CITY – Iduso na sa Toril Police ang kasong kalapasan sa RA 10591 (Illegal Possession of Firearms) batok sa usa ka B’laan tribal leader nga nasikop human nga nagdala-dala ug armas dihang gihiling kini sa checkpoint sa Task Force Davao sa Barangay Sirawan, Toril District niining milabay nga adlaw.
Una ng giila ni Lt. Col. Nestor Mondia, detachment commander ang suspek nga si Alberto Amy Bantilan, 73, residente sa Barangay Sinawal, General Santos City.
Pinasikad sa report, nagpahigayon ug checkpoint ang kasundalohan ug dihang ilang gi-inspeksiyon ang itom nga Toyota Fortuner gikan sa amihanang bahin ug pasulod sa dakbayan sa Davao, namatikdan sa mga nahisgutan nga adunay gisulod sa sling bag nga dala sa pasahero nga naglingkod sa atubangan nga bahin.
Dihang gisusi, narekober ang .45 nga kalibre sa pistola nga adunay magazine nga gi-undan sa 21 ka mga buhing bala. Matud pa kang Police chief Inspector Ronald Lao, hepe sa Toril PNP bisan nga adunay lisensiya ang armas nga gihuptan sa dinakpan, apan pakyas sumala pa ang nahisgutan nga maka-presenta ug permit to carry firearms outside residence hinungdan nga gibalhug nila kini sa presohan.
