DAVAO CITY – Nanawagan ang Department of the Interior and Local Government (DILG)-Davao Region sa nagkadaiyang local government units (LGU) ug barangays sa rehiyon nga moduso ug magpatuman ug ordinansa nga i-ban ang videoke sessions ug uban pang pagsaba-saba nga mamahimong makadisturbo sa online classes sa estudyante.
Sumala pa kang DILG-Davao Director Alex Roldan, nag-isyu karon ang DILG ug direktiba nga nag-awhag sa mga LGUs nga magpatuman gilayon ug ordinansa nga nagdili sa videoke ug uban pang distracting noises atol sa online classes ilabi na nga mayorya sa mga estudyante karon ang nagtuon sa ilang panimalay isip kabahin sa blended learning system.
Aduna sumala pay igong rason aron nga ipatuman ang maong lakang sanglit ang kusog nga tugtog mamahimong makababag ug makadisturbo sa pagtuon sa mga estudyante, schoolwork, ug uban pang aktibidad.
Gawas niini, nagpabilin sab nga suliran karon ang “new normal” classroom setup nga anaa lamang sa mga panimalay kini tungod sa hinay nga internet connection.
Nanawagan na lamang si Roldan sa mga ginikanan ug estudyante nga moduso ug reklamo batok sa iyang mga silingan nga makalapas sa maong kamandoan aron nga mahatagan gilayon kini ug aksiyon sa barangay.
