Misaka ngadto sa P19.065 trilyon ang kinatibuk-ang nahibiling utang sa gobyerno sa Pilipinas sa katapusan sa Hunyo, sumala sa Bureau of the Treasury (BTr).
Mas taas kini og P518.98 bilyon kumpara sa P18.546 trilyon niadtong katapusan sa Mayo, ug mas taas usab kumpara sa P17.267 trilyon nga natala niadtong Hunyo sa miaging tuig.
Matod sa BTr, ang 2.8 porsiyentong pagtaas sa utang naggikan sa mas dakong pangutang sa gobyerno, sa sulod man o gawas sa nasud, aron pondohan ang mga programa para sa kalambuan.
Nakatabang usab ang paglig-on sa piso aron gamay ra ang pagtaas sa kinatibuk-ang utang.
Miabot sa P12.837 trilyon ang domestic debt o utang sa sulod sa nasud.
Mas taas kini og 2.74 porsiyento kumpara sa Mayo ug 7.43 porsiyento kumpara sa susamang panahon sa miaging tuig.
Ang maong kantidad tanan gikan sa government securities.
Niadtong maong panahon, nakarekord ang gobyerno og P342.93 bilyon nga net issuance sa government securities, samtang mikunhod og P0.60 bilyon ang kantidad sa onshore dollar bonds tungod sa paglig-on sa piso.
Samtang, miabot sa P6.227 trilyon ang external debt o utang gikan sa gawas sa nasud, nga mas taas og P176.66 bilyon gikan sa P6.051 trilyon niadtong katapusan sa Mayo.
Kini tungod sa dugang nga pagpangutang sa gawas sa nasud nga mikabat og P223.11 bilyon.
