DAVAO CITY – Padayon karon nga ginatambalan sa Southern Philippines Medical Center (SPMC) ning dakbayan sa Davao ang 4-anyos nga babae nga gidunggab sa mismong amahan niini sulod sa ilang pinuy-anan kagabii.
Si Sofia Nonoy, 4-anyos ang padayong gina-obserbahan sulod sa maong balay tambalanan human makaangkon ig samad dununggaban sa iyang tiyan samtang dead on the spot ang 3 ka igsoon niini nga sila RJ Nonoy, 13; Cyrus Nonoy, 11, ug Aira Nicole Nonoy, 7; nga nakaangkon og ubay-ubay nga samad dinunggaban sa ilang lawas.
Una nang nasayran nga ang mismong amahan sa biktima nga si Noel Nonoy, 40-anyos, usa ka karpentero ang midunggab sa mga kaugalingong anak niini gamit ang kutsilyo human nga wala miuli ang milayas nga misis.
Sa pakighinabi sa Bombo Radyo Davao kang PSupt. Giusseppe A. Geralde, hepe sa IGaCoS PNP, ang mga anak sumala pa ni Joel ang iyang napahimungtan human sa nahitabo nga paglayas ug wala na pag-uli sa iyang asawa.
Dugang pa ni PSI Geralde nga sa pagtuo nga nagagamitan ug droga ang suspek tungod sa paghimo sa maong brutal nga insidente, ilaha nga pangitaan ug pamaagi nga mapailalum sa drug test.
Kasong multiple parricide ug frustrated parricide ang atubangon sa nahisgutan nga suspetsado.
