Gibutyag ni retired Senior Associate Justice Antonio Carpio nga dili na kinahanglan ang pag-apruba sa mga korte sa Pilipinas aron maipatuman ang warrant of arrest nga gipagawas sa International Criminal Court batok kang Sen.Ronald dela Rosa.
Sa usa ka interbyu, gipaklaro ni Carpio nga sakop sa international law ang crimes against humanity, busa mahimo kini nga dinggon sa ICC bisan walay direktang pagtugot gikan sa lokal nga hukmanan.
Matod kaniya, nakalatid sa 1987 Constitution of the Philippines nga giila sa nasod ang kinatibuk-ang prinsipyo sa international law, lakip ang pagpanubag sa crimes against humanity.
Dugang pa ni Carpio, bisan unsang nasod o international tribunal mahimong adunay hurisdiksyon sa maong kaso tungod kay kini giisip nga krimen batok sa tibuok katawhan.
Matud pa, niadtong Mayo 13, gisalikway sa Supreme Court of the Philippines ang gihangyo ni Dela Rosa nga temporary restraining order o TRO aron pugngan ang posibleng pagpatuman sa ICC warrant batok kaniya.
Alang kang Carpio, ang wala pagpagawas og TRO usa ka timailhan nga mahimong ipadayon sa mga awtoridad ang pag-aresto.
Gipasabot usab niya nga ubos sa Republic Act No. 9851, adunay gahum ang gobyerno ug ang presidente kung itugyan ba sa ICC ang akusado o husayon kini dinhi sa Pilipinas.
Tungod niini, giingon ni Carpio nga dili mahimong ipugos ni Dela Rosa nga sa Pilipinas lamang siya husayon.
Si Dela Rosa karon nag-atubang og warrant of arrest gikan sa ICC kalabot sa alegasyon sa crimes against humanity nga konektado sa kampanya batok sa ilegal nga droga sa administrasyon ni kanhi Pang. Rodrigo Duterte.
