DAVAO CITY – Kumpirmadong usa sa lima ka mga nakabsan sa kinabuhi atol sa nahitabog pagpamomba sa Mindanao State University – Marawi ang taga-Davao Region.
Giila ang biktima nga si Evangeline Aromin, 31-anyos, usa ka Physical Education teacher sa MSU-Marawi ug residente sa Sitio Sto. Niño, Barangay New Clarin, Bansalan, Davao del Sur.
Subay sa social media post sa iyang igsuon, gikatakdang iuli sa Bansalan ang patayng lawas sa maong magtutudlo gikan Iligan City sa musunod nga adlaw.
Nagsubo ang pamilya ni Evangeline gumikan sa pagkawala sa kinabuhi niini. Nailhan sa pamilya si Evangeline nga usa ka maayong anak, igsuon ug higala.
Nanawagan karon ang pamilya ni Evangeline nga kasamtangan nga anaa sa Bansalan sa mga awtoridad sa hinanaling pagkab-ot sa hustisya dungan ang kasubo sa nahitabo sa ilang anak.
Nahilakip ang nahisgutan sa lima ka mga kinabuhi nga nakabsan atol sa pagbusikad sa bomba sulod sa Dimaporo Gymnasium sa MSU Marawi City, pasado alas 7 sa buntag niadtong adlawng Domingo, Disyembre 3, 2023 samtang gipahigayon ang Santos nga Misa.
