Nangayo og pasaylo ang Philippine National Police–Cateel sa nahitabo nga sayop nga social media post nga nakatag sa pipila ka progresibong lider sa ilang Facebook page. Sumala pa ni PMaj. Michael P. Celecio, hepe sa PNP Cateel, sayop o “mistake” ang maong pag-post ug wala kini tuyoa.
Matod pa niya, kasagaran gamiton ang ilang social media page sa pagpahimangno sa publiko ug pagpangayo og tabang sa pag-ila sa mga persona nga adunay nagbarog nga warrant of arrest. Dugang pa niini, iyang gipatin-aw: “Wala me intention ipost tu siya. Mistake lang gyud to nga napost siya sa among social media.”
Sa kasamtangan, gipahibalo sa opisyal nga palig-onon nila ang screening process sa tanang ipang-post sa ilang Facebook account aron malikayan ang susamang insidente. Gipatin-aw usab sa PNP Cateel nga ang mga progresibong lider nga naapil sa post walay nagbarog nga warrant ug dili wanted sa maong lugar.
Ang maong isyu mitumaw human sa reklamo sa pipila ka progresibong grupo kalabot sa gi-delete na nga post nga nagtawag kanila nga “Active Wanted Persons” sa Davao City, diin makita ang ilang mga hulagway, ngalan, ug organisasyon.
