Usa ka senior citizen, kabsan sa kinabuhi human sa nahitabong sunog

DAVAO CITY – Kabsan sa kinabuhi ang usa ka senior citizen atol sa nahitabong sunog sa Del Rio, Catalunan Pequeno, ning dakbayan kagabii, Marso 20, 2024.

Sa inisyal nga imbestigasyon, pasado alas dyes sa gabii nahitabo ang sunog samtang nahinanok sa tulog ang biktima nga giilang si Mariapas Banol, 60 anyos, dalaga.

Saysay sa igsuon sa biktima nga si Tessie Bangcayaw, lampara ang hinungdan sa maong sunog nga sumala pa nasaghiran sa iyang mga binuhing iring samtang natulog.

Gama sa light materials ang nahisgutang balay hinungdan nga paspas kining mikuyanap nga miresulta sa pagkaugdaw niini.

Gibana-banaang mokabat sa kapin P50,000 ang damyos sa nahitabong sunog. Ning kasamtangan, anaa sa Angel Funeral Homes ang patayng lawas sa biktima.