DAVAO CITY – Kabsan sa kinabuhi ang pito ka indibidwal, samtang duha ang grabeng naangol ug napulo pa ang padayon pang gipangita tungod sa pagdahili sa yuta nga nahitabo sa Purok 20, Pag-asa, Barangay Mt. Diwata, Monkayo, Davao de Oro pasado alas dose kagahapon, Enero 18.
Giila ang mga biktima nga sila Catherine Gumatin, 27 anyos; alyas Hannah, 9 anyos; alyas Dysna, 3 anyos; alyas Arjay, usa ka tuig ang pangidaron; alyas Cristelle, 10 anyos; alyas Ailee, 8 anyos, ug Marjomie Nenaria, 33 anyos.
Samtang gikatahong nangawala sila Rommel Gumatin, 36 anyos; Agnes Bitoon, 44 anyos, Elvera Saldua, 35 anyos; ug Ritchel Reboldad, 35 anyos.
Gikatala sab ang tulo ka mga samaran nga giilang sila Dexter Cruda, 49 anyos; Bernadeth Cruda, 51 anyos, ug alyas Kate, usa ka tuig ang pangidaron.
Gibutyag ni Jergrace Cabag, information officer sa Monkayo, nga nahugno ang yuta sa maong lugar nga minahan tungod sa walay hunong nga pag-uwan sukad niadtong Lunes.
Dugang pa niini nga naglisod ang mga rescuer sa pagkuha sa mga lawas sa mga biktima tungod kay nagpadayon ang pagdahili sa yuta hinungdan nga temporaryo nga nahunong ang search and retrieval operations.
Gawas niining dapita, pipila pa ka mga pagdahili sa yuta ug grabeng baha ang natala usab sa Davao de Oro diin liboan ka mga pamilya ang namakwit.
Dugang pa sa opisyal nga sa wala pa mahitabo ang pagdahili sa yuta, gipahigayon ang prayer meeting sa usa sa mga balay nga natabunan hinungdan nga daghan ang mga biktima nga niabot sa 13 ka indibidwal.
