Hugot nga gipanghimakak sa testigong si Ramil Madriaga nga adunay bisan kinsa nga mipugos, mibayad, o nagsaad nga buhian siya isip kapalit sa iyang pinanumpaang pahayag kalabot sa giingong mga kalihokan ni Vice President Sara Duterte ug sa iyang pamilya.
Atol sa pagpaminaw sa House Committee on Justice, giingon ni Madriaga nga boluntaryo niyang gihimo ang iyang affidavit ug wala siya napugos o nangayo og bisan unsang kapalit. Sa pagpangutana ni Deputy Speaker ug Iloilo Representative Janette Garin kung nganong nakadesisyon siya nga mosulti, gipahayag ni Madriaga nga katungod sa katawhang Pilipino nga mahibal-an ang giingong iregularidad nga nalambigit si Atty. Harry Roque, lakip na ang isyu sa land grabbing ug ang giingong pagpasagad niini ni Duterte.
Sumala pa kaniya, Importante nga mahibal-an sa publiko ang giingong mga iregularidad ni Roque nga gipanipdan matud pa ni Vice President Sara Duterte.Dugang pa ni Madriaga, dili lang sa usa ka lugar nahitabo ang maong isyu, kundili sa lain-laing bahin sa Luzon, apil na ang Zambales ug Pangasinan, diin adunay mga mag-uuma nga naapektuhan.Gipunting usab niya ang sitwasyon sa Mariveles, Bataan, diin adunay mga mag-uuma nga unta makadawat og Certificate of Land Ownership Awards gikan sa Department of Agrarian Reform, apan nagkalisod tungod sa giingong plano nga gamiton ang yuta alang sa Philippine Offshore Gaming Operators (POGOs).
Sa iyang affidavit ug supplemental affidavit, giangkon usab ni Madriaga nga nagsilbi siya kaniadto isip “bagman” ug political officer nga nagtrabaho sa intelligence gathering para sa pamilya Duterte.Sa pagkakaron, padayon pang giimbestigahan sa Kamara ang maong mga alegasyon.
