DAVAO CITY – Gipasidunggan sa Davao City Overland Transport Terminal ang ilang matinud-anong empleyado nga nag-uli ug mga kagamitan sa usa ka pasahero sulod sa terminal.
Nasayran nga niadtong Oktubre 2 sa gabii, naplagan sa ilang porter nga si Jerel Untua Olenio ang usa ka bag nga nasa Gate 7 ug gipanag-iyahan sa usa ka negosyanteng si Binu Chandrikamma Rajek, nga taga-Dubai, UAE; ug nakabase karon sa General Santos City.
Gihiling ang maong bag niadtong Oktubre 4 sa Public Assistance Counter sa terminal. Gipadangat sab kini kang DCOTT Manager, Dr. Aisa S. Usop ug gipaningkamutan nilang makontak ang tag-iya sa maong bag.
Oktubre 7 dihang malampusong nahatag sa tag-iya ang maong bag nga nag-unod ug pipila ka mga importanteng gamit sama sa laptop, passport, mga papeles, checkbook, relo, ug uban pa.
Bisan pa man sa personal nga kaagi ni Olenio, wala matud pa nagduha-duha ang maong porter nga iuli ang mga kabtangan ngadto sa tag-iya.
via || Bombo LJ Florendo
