Gitawag ni kanhing Presidential Spokesperson Salvador Panelo nga “palpak” ang gihimong legal nga lakang sa kampo ni Sen. Ronald “Bato” dela Rosa kalabot sa mga petisyon nga gisumite sa Korte Suprema aron pugngan ang pagpatuman sa arrest warrant gikan sa International Criminal Court (ICC).
Gibutyag ni Panelo nga sayop ang pagduso og mga petisyon alang sa writ of amparo, certiorari, prohibition, ug Temporary Restraining Order (TRO) pinaagi sa abogado niini nga si Atty. Israelito Torreon.
Matud pa niya, mas angay unta nga writ of habeas corpus ang gisumite aron direktang makwestyon dayon ang legalidad sa arrest warrant.
Kini human ibasura sa Korte Suprema, pinaagi sa 9-5-1 nga boto, ang petisyon ni Dela Rosa nga nagtinguha sa pagpahunong sa implementasyon sa ICC warrant.
Sa karon wala pa mohatag usab og pahayag ang mga abogado sa senador.
