DAVAO CITY – Gisugyot karun sa usa ka analyst nga unta pagatutukan sa gobyerno ang agulo sa katawhan tungod sa pagsaka sa inflation rate sa nasud Pilipinas ug dili mahisusama sa mga kagubot nga nahitabo sa nasud Sri Lanka.
Sa pakighinabi sa Bombo Radyo Davao kang Professor Ramon Belleno III, gikanayon niya nga dakong hagit karon sa gobyerno ang paghatag og solusyon sa krisis nga giatubang karon sa Pilipinas, sama sa nahitabo sa Sri Lanka diin doble ang pagsaka sa mga presyo sa ilang nag-unang mga palaliton ilabi na ang pagmahal sa lana.
Dako sab ang kawad-on sa ilang gobyerno sa pagpataw og gagmay’ng buhis ngadto sa katawhan, hinungdan nga nalugi ang panggamhan ug nagkakuwang sab ang ilang pondo nga magamit unta sa pag-angkat og gasolina sa ubang nasud.
Dagko sab ang epekto sa gross investment reserve diin makakuha og pondo sa usa ka nasud pinaagi sa pagsulod sa dolyar.
Sa kaso sa Pilipinas, ang mga export products, remittances gikan sa mga OFWs ug mga investors sama sa BPO companies, magahatag kini og dagkung pundo sa nasud aron naay makuha ang panggamhanan sa panahon sa krisis.
Bisan layo ang Pilipinas sa kasamtangang sitwasyon sa Sri Lanka, naghatag sab og suhestyon si Belleno sama na lamang sa pagpahamtang og excise tax diin diha dapat magagikan ang mga hinabang nga idalit sab sa mga naningahanglan sama sa sektor sa transportasyon ug pang-uma; ug ang pagsulod sa gobyerno sa matang sa balaudnong pang-ekonomiya aron ma-monitor ang gikusgon sa dolyar kontra piso.
Dagko sab ang pagsalig ni Belleno sa mamahimong laraw ni Pangulong Ferdinand Marcos Jr. nga ipabuhagay sa mahitabong State of the Nation Address kon SONA, sa matang sa ekonomiya ilabi nang nagapadayon ang krisis sa Pilipinas mahitungod sa pagsaka sa inflation rate sa kasamtangan.
Kagahapon, nagdeklara na og state of emergency ang Sri Lanka tungod sab sa mga demonstrasyon nga gihimo sa mga tawo sa presidential palace ug ang nagapadayong kagubot atol sa economic fallout sa maong nasud samtang missing in action gihapon ang ilang pangulo nga si Gotabaya Rajapaksa nga giingong anaa karun sa nasud Maldives.
Via || LJ Florendo
