Gidid-an sa Senate impeachment court ang House prosecution panel sa paggamit pag-usab sa mga dokumento sa Commission on Audit (COA) nga ilang gipresentar kaniadto sa Article 1 isip ebidensiya sa Article 2 batok kang Vice President Sara Duterte.
Sumala sa mando nga gipagawas kaniadtong Nobyembre 5,2026 ug gipahibalo sa publiko niadtong Biyernes, liboan ka dokumento kalabot sa paggamit sa confidential funds sa Office of the Vice President (OVP) ug Department of Education (DepEd) ang wala tugoti nga isumite pag-usab.
Kini human giatras sa prosecution panel ang Article 1 nga nag-akusar kang Duterte sa sayop nga paggamit sa kapin ₱612 milyones nga confidential funds sa iyang panahon isip bise presidente ug kalihim sa edukasyon.
Gipasabot sa mando nga ang mga ebidensiya nga gigamit sa maong artikulo dili na mahimong ipresentar pag-usab o gamiton isip dugang nga basihan sa alegasyon sa unexplained wealth ubos sa Article 2.
Bisan pa niini, gidawat sa korte ang ubang ebidensiya sa prosekusyon, lakip ang Statements of Assets, Liabilities and Net Worth (SALNs) ni Duterte, mga rekord sa Securities and Exchange Commission (SEC), PhilGEPS, mga titulo sa yuta, bank records, ug mga dokumento gikan sa Anti-Money Laundering Council (AMLC), apan adunay mga limitasyon sa paggamit niini.
Lakip usab sa gidawat ang bahin sa financial forensic report sa prosecution witness nga si Atty. Alexander Cabrera, apan wala apila ang pipila ka bahin nga naggikan sa JTC Group ug Pikimong Pikimong Philippines Corp.
Gipatin-aw ni impeachment court spokesperson Reginald Tongol nga ang pagdawat sa mga dokumento isip ebidensiya wala magpasabot nga napamatud-an na ang mga alegasyon o kuwenta sa prosekusyon. Ang mga senador-judges gihapon ang motino sa gibug-aton ug kamatuoran sa maong mga ebidensiya sa kataposan sa pagtaral.
Kahinumduman usab nga kaniadtong Oktubre 13, giatras sa prosekusyon ang Article 1, Article 3 nga may kalabotan sa bribery, ug Article 4 bahin sa giingong grave threats. Ang Article 2 na lamang nga naghisgot sa unexplained wealth ang nahibiling kaso batok sa bise presidente.
Nakatakdang ipadayon ang impeachment trial karung umaabot nga Lunes, Nobyembre 9. Samtang, gibawi sa kampo sa depensa ang ilang hangyo nga patawagon pinaagi sa subpoena si law professor Ralph Sarmiento, nga midumili sa pagtestigo alang kang Duterte.
