Pormal nang nanumpa si Associate Justice Rodil V. Zalameda isip ika-28 nga Chief Justice sa Korte Suprema sa Pilipinas, atol sa oath-taking ceremony nga gipahigayon sa Supreme Court En Banc Session Hall niining Biyernes sa hapon, Nobyembre 6, 2026.
Gipangunahan ni Senior Associate Justice Marvic Leonen ang pagpahigayon sa panumpa ni Zalameda human kini opisyal nga gitudlo ni Pangulong Ferdinand Marcos Jr. sa maong posisyon.
Puli si Zalameda kang kanhi Chief Justice Alexander Gesmundo nga miretiro na karong adlawa human matapos ang iyang termino sa pinakataas nga korte sa nasud.
Una nang nahimong Associate Justice sa Korte Suprema si Zalameda niadtong Agosto 6, 2019, human kini gitudlo ni kanhi Pangulong Rodrigo Duterte.
Nagsilbi usab kini isip Associate Justice sa Court of Appeals sulod sa 11 ka tuig ug nahimong presiding justice sa 17th Division niini. Nakaangkon usab kini og kasinatian isip Branch Clerk of Court sa Regional Trial Court sa Makati.
Nagsugod ang iyang karera sa serbisyo publiko isip prosecutor niadtong 1995, sa wala pa matudlo isip City Prosecutor sa Mandaluyong niadtong 2002. Nagpraktis usab kini sa pribadong abogasya gikan 1990 hangtod 1995.
Nagtapos si Zalameda og Bachelor of Laws sa Ateneo de Manila University niadtong 1987 ug nakapasar sa Bar Examinations niadtong 1988.
