Naangol sa sunog ang unom ka balay sa Panacan 13, Barangay Panacan, Davao City, diin upat ang hingpit nga nadugaw ug duha ang partially damaged.
Nahitala ang sunog alas 12:55 sa udto niadtong September 1, 2026.
Base sa unang impormasyon, usa ka person with disability o PWD ang naluwas human gitabangan sa mga silingan nga makagawas sa balay.
Giingong siya lamang ang nahibilin sulod sa maong balay sa dihang kalit nga miulbo ang kalayo.
Matod sa mga residente, nagsugod ang sunog sa ikaduhang andana sa usa sa mga balay ug paspas kining mikatag ngadto sa kasikbit nga mga kabalayan tungod kay kadaghanan niini hinimo sa light materials.
Dali usab nga nagtinabangay ang mga residente sa pagpugong sa kalayo samtang nagpaabot sa pag-abot sa mga bombero.
Wala pa matino ang eksaktong hinungdan sa sunog ug ang kinatibuk-ang kantidad sa kadaot.
Padayon ang imbestigasyon sa Bureau of Fire Protection aron masuta kon diin eksaktong nagsugod ang kalayo ug unsa ang posibleng hinungdan niini.
Wala usab gilayon gitaho nga adunay namatay sa maong insidente.
Samtang, padayon usab ang assessment aron matino ang panginahanglan sa mga pamilyang naapektuhan sa maong sunog.| VIA BOMBO EROS PAJOTA
