Interesado ang United Arab Emirates ug Saudi Arabia nga magtukod og oil storage facilities sa Pilipinas isip kabahin sa plano sa gobyerno nga mapalig-on ang seguridad sa suplay sa lana sa nasud.
Matod ni Department of Energy Oil Industry Management Bureau Director Rino Abad, wala’y direktang gasto ang gobyerno sa pagtukod sa maong facilities tungod kay foreign-owned ug commercially operated kini.
Tumong sa plano nga adunay mas lig-on nga reserve supply ang Pilipinas kung adunay problema o disruption sa global oil market.
Gipasabot ni Abad nga gusto sa gobyerno nga adunay arrangement nga maghatag sa Pilipinas og priority o reserve rights sa stored fuel kung adunay krisis sa supply.
Kung maaprubahan ang proyekto, target nga maka-accommodate ang hub og hangtod 50 million barrels nga petroleum products.
Nagpadayon na usab ang koordinasyon sa bag-ong gitukod nga Philippine Strategic Petroleum Reserve team uban sa Saudi Arabia bahin sa maong proposal.
Laumang makatabang ang proyekto sa pagpamenos sa risgo nga makulangan og suplay ang nasud panahon sa global oil disruptions ug geopolitical tensions.
Padayon pa ang mga diskusyon kabahin sa technical, commercial ug policy arrangements sa maong oil storage plan.
