Gilauman nga mosaka pag-usab ang presyo sa produktong petrolyo sa nasud nga mahimong moabot hangtod ₱5 matag litro tungod sa nagpadayon nga tensyon sa Middle East nga nakaapekto sa global oil prices.
Sumala sa forecast ni Jetti Petroleum president Leo Bellas, posibleng mosaka ang presyo sa diesel og ₱2 hangtod ₱2.50 matag litro, samtang ang gasolina mahimong mosaka og ₱4.50 hangtod ₱5 matag litro.
Ang pagsaka sa presyo sa lana sa internasyonal nga merkado tungod sa kabalaka sa posibleng pagkaapekto sa suplay sa enerhiya gikan sa Middle East tungod sa nagpadayon nga panagbangi.
Pagpasabot niya nga nakaapekto sa presyo ang pagkunhod sa export sa lana gikan sa maong rehiyon ug ang mga lakang sa ubang nasud nga nakaapekto sa suplay.
Gibutyag usab ni Energy Secretary Sharon Garin nga ang pagsaka sa presyo sa petrolyo naapektuhan usab sa paghuyang sa Philippine peso batok sa US dollar nga naabot na usab sa bag-ong record low nga ₱62.68 matag $1.
Sa laing bahin, nangandam na ang Department of Finance alang sa posibleng pagsuspinde pag-usab sa excise tax sa kerosene ug LPG kung makumpirma nga misaka na usab ang presyo sa Dubai crude oil.
