Gipaabot sa prosecution nga mosaka ang interes sa publiko sa impeachment trial ni Vice President Sara Duterte sa pagsugod sa paghisgot sa alegasyon kabahin sa mga kabtangan nga walay klarong tinubdan sa sunod semana.
Matud ni Manila Representative Joel Chua, pilion lamang sa prosecution ang mga importanteng bank account ug financial records nga gi-report sa mga bangko aron ipresentar isip ebidensya ubos sa Article 2 sa impeachment case. Lakip sa gilauman nga mopresentar sa maong mga ebidensya sila Representatives Chel Diokno ug Terry Ridon.
Sumala pa ni Chua, mahimong mas tutokan sa publiko ang mga rekord ug impormasyon nga ipagawas sa prosecution, ilabina ang mga transaksyon ug pinansyal nga kalihokan nga ilang giingong may kalabotan sa alegasyon batok kang Duterte.
Dugang pa, gihulagway ni Deputy Speaker Paolo Ortega V nga usa sa mga giatangan nga bahin sa impeachment proceedings mao ang alegasyon kabahin sa bilyon-bilyong pisong pondo nga gikonektar kang Vice President Sara.
Gitinguha sa prosecution nga mapadali ang pagtaral pinaagi sa dili na pagpresentar sa tanang bank account ug transaksyon, apan pilion lamang ang mga rekord nga ilang giisip nga labing importante sa pagpalig-on sa maong alegasyon.
Gikatakdang sugdan sa prosecution karong Lunes ang pagpresentar sa mga ebidensya may kalabotan sa alegasyon sa mga kabtangan nga wala mapatin-aw ang gigikanan ni Vice President Sara Duterte.
Kahinumduman nga ang maong alegasyon kabahin sa Article 2 sa impeachment case batok sa Bise Presidente.
