Miabot na sa New Delhi, India si President Ferdinand R. Marcos Jr. alang sa iyang pag-apil sa 18th BRICS Summit nga ipahigayon karong Septiyembre 12 ug 13.
Mitambong si Marcos sa maong tigom isip chair sa Association of Southeast Asian Nations o ASEAN karong 2026 ug isip usa sa mga nasod nga giimbitar alang sa outreach sa BRICS.
Gilauman nga ipadayag sa Pangulo ang mga prayoridad sa ASEAN ug itulod ang mas lapad nga kooperasyon tali sa mga nasod sa ASEAN ug mga miyembro sa BRICS.
Lakip sa mga isyung hatagan og pagtagad ang komersiyo, pamuhunan, seguridad, seguridad sa pagkaon ug enerhiya, ingon man ang pagpalig-on sa mga nasod batok sa epekto sa pagbag-o sa klima.
Sumala pa, importante ang pag-apil sa Pilipinas sa summit tungod sa oportunidad nga mapalig-on ang relasyon sa ASEAN ngadto sa mga nag-unang nag-uswag nga ekonomiya sa kalibotan.
Dugang pa niini, magpahigayon usab si Marcos og bilateral meeting kang Indian Prime Minister Narendra Modi aron hisgutan ang mga isyu ug interes nga pareho nilang gihatagan og pagtagad, lakip ang kooperasyon tali sa Pilipinas ug India.
Kahinumduman nga kabahin sa foreign engagements ni Marcos isip ASEAN chair ang iyang pagbisita sa India, diin gipaabot nga ipasiugda niya ang interes sa Pilipinas sa ekonomiya, seguridad ug kooperasyon sa rehiyon.
Sa pagkakaron, nagpadayon ang mga kalihokan alang sa BRICS Summit diin gilauman ang dugang nga panaghisgot tali sa mga lider bahin sa kooperasyon sa ekonomiya, seguridad ug uban pang importanteng isyu sa rehiyon ug sa kalibotan.
