Nagpadayon karong Lunes ang ika 22 nga adlaw sa impeachment trial batok kang Vice President Sara Duterte diin gisugdan sa House prosecution panel ang paghisgot sa mga transaksyon sa kanhing Department of Education o DepEd Special Disbursing Officer nga si Edward Fajarda.
Gipangayo sa prosekusyon sa depensa nga magkasabot kabahin sa pag-encash ni Fajarda sa tulo ka tseke gikan sa DepEd nga mikabat sa P112 milyon, o P37.5 milyon matag usa.
Gipangayo usab sa House panel ang stipulation kabahin sa pag-disburse o pag-turn-over ni Fajarda sa maong kantidad ngadto kang Col. Dennis Nolasco, kanhing Deputy Commander sa Vice Presidential Security and Protection Group.
Apan naglalis ang duha ka kampo kabahin sa kalainan sa mga terminong “turn-over” ug “disburse.” Bisan pa niini, ubos sa pagdumala ni Trial Presiding Officer Chiz Escudero, nagkauyon ang duha ka panig nga tinuod nga nadawat ni Nolasco ang maong pondo.
Gipangayo usab sa prosekusyon nga dawaton sa depensa nga gihatag ni Fajarda ang maong kantidad kang Nolasco subay sa mando ni Vice President Duterte, base sa iyang naunang pamahayag atol sa pagdungog sa House Justice panel.
Sa counter-stipulation sa depensa, gipatin-aw niini nga walay direktang kahibalo si Fajarda kung giunsa paggasto ang maong pondo, bisan pa man nga mipirma siya sa pipila ka certification kalabot sa pag-disburse niini.
Sa kinatibuk-an, gidawat sa depensa ang kadaghanan sa 13 ka request for stipulation sa House panel human gikumpirma nga dili na makatestigo si Fajarda sa paglitis tungod sa iyang kahimtang sa panglawas.
Samtang, ang kasamtangang testigo nga gipatindog sa prosekusyon mao si Philippine Statistics Authority o PSA Assistant National Statistician Marizza Grande.
Gipaabot nga motestigo si Grande kabahin sa pag-verify sa mga ngalan sa giingong nakadawat sa confidential funds sa Office of the Vice President ug sa DepEd, lakip ang ngalan nga “Mary Grace Piattos.”
Sumala sa prosekusyon, may kalabotan ang testimonya ni Grande sa ilang alegasyon nga adunay mga fictitious o dili tinuod nga indibidwal nga gilista isip recipients sa maong pondo.
Lakip usab sa mga testigong gimandoan sa Senate impeachment court nga motestigo gikan Septiyembre 7 hangtod 9 sila COA employee Bresilio Sabaldan, DepEd Assistant Secretary Sunshine Fajarda, ug Police Major Jovelyn Magay.
