Mipaspas pa ang lihok sa Typhoon Saudel samtang paingon sa Philippine Sea, silangan sa Extreme Northern Luzon, sumala sa PAGASA.
Namatikdan ang bagyo mga 1,680 kilometros silangan sa Extreme Northern Luzon, gawas sa Philippine Area of Responsibility.
Subay sa gipagula nga impormasyon sa PAGASA, adunay maximum sustained winds nga 175 kilometers per hour ug pagbugso nga moabot sa 215 kilometers per hour, samtang nagalihok kini paingong west-northwest sa 30 kilometers per hour.
Dugang pa, gilauman nga mosulod ang Saudel sa northeastern boundary sa PAR karong Lunes sa buntag o hapon, diin hatagan kini og lokal nga ngalang “Obet.”
Base sa forecast track, magpabilin kini sa Philippine Sea ug posibleng mogawas usab sa PAR sa Martes, Agosto 25, 2026.
Lakip sa ginamonitor sa PAGASA ang duha pa ka tropical depression sa gawas sa PAR.
Sa pagkakaron, adunay mapanganuron nga kalangitan, scattered rains ug thunderstorms sa Metro Manila, Ilocos Region, Cordillera, Central Luzon ug ubang bahin sa Luzon.
