DAVAO CITY – Padayon pang ginasuta sa kapulisan kung unsa ang motibo ug kung sa asa nga grupo konektado ang mga suspect nga misunog sa usaka truck nga nag-karga ug mga saging binangay sa Pantukan, Compostela Valley province niadtong milabay nga semana.
Na-una nang gika-report nga Ugdaw ang usaka forward truck nga nagkarga ug mga saging binangay human gisunog sa duha ka mga armadong lalaki sa Sityo Patilan, Barangay Bongbong, Pantukan, Compostela alas 4 sa hapon, Biyernes, Enero 19.
Mismo ang driver sa truck nga si Randil Beltran ang mireport sa Pantukan Municipal Police station sa panghitabo.
Subay sa initial investigation sa kapulisan, duha ka mga wala mailhing lalaki nga sakay ug motor ang kalit nga mi-abot sa nahisgutang dapit ug gidauban ang Isuzu forward L120 nga adunay plate number WHM 950 nga gipanag-iyahan ni Dailyn Ilgincolin nga nagkarga ug mga saging nga binangay.
Sa dihang misilaob na ang truck paspas nga miikyas ang mga suspect paingon sa Upper Pangasinan, Kingking Pantukan Compostela Valley province.
Nagtinabangay ang kapulisan sa Pantukan, 1101st Maneuver Company ug 11th Regional Public Safety Battalion sa paggukod sa paglusad ug pursuit operation.
Sa tabang sa mga residente naabtan sa kapulisan ang mga suspect hinungdan nga natigayon ang pinusilay. Apan nakahimo sa pag-ikyas ang mga armado.
Hinuon atol sa clearing operation narecover sa mga otoridad ang usaka color ula nga Honda XRM nnga motorsiklo nga dunay plate number IU 1077.
Nakuha usab gikan sa utility box sa motor ang 6 ka wala pa maka-boto nga bala sa kalibre 45 nga pistola ug lain pang duha ka basiyo sa bala sa maong armas ug usaka .38 caliber revolver.
