Gikondena ni Defense Secretary Gilberto “Gibo” Teodoro Jr. ang aksyon sa China batok sa kapin 100 ka Pilipino nga giingong ilegal nga nagtrabaho o nagpuyo didto, ug gitawag kini nga “extortion ug blackmail.”
Matud ni Teodoro, dili angay itandi ang maong kaso sa pagkadakop sa mga Chinese nationals sa Pilipinas tungod kay ang mga operasyon dinhi gihimo pinaagi sa legal nga search warrants ug adunay kalabotan sa giingong ilegal nga kalihokan.
Samtang, giklaro sa China nga ang ilang aksyon kabahin sa pagpatuman sa immigration laws ug gihimo sa “standard ug civil manner.”
Nakig-koordinar na ang Department of Foreign Affairs sa Philippine Embassy sa Beijing ug mga konsulado aron matino ang eksaktong gidaghanon ug kahimtang sa mga Pilipinong apektado.
Gihangyo sa DFA ang China nga sigurohon ang welfare sa mga Pilipino ug pahibaloan dayon ang Philippine diplomatic posts kabahin sa ilang detention.
