Gipahibalo ni Bangsamoro Autonomous Region in Muslim Mindanao (BARMM) Chief Minister Abdulraof Macacua ang 19 ka opisyal nga mopuno sa iyang Cabinet, pipila ka adlaw human mapili isip pangulo sa rehiyon.
Naglangkob kini sa 17 ka ministro ug duha ka hepe sa dagkong opisina nga gilauman niyang mopadayon sa moral governance nga gisugdan sa pagkatukod sa regional government kaniadtong 2019.
Gikan sa 50 ka aplikante, siyam sa napili ang miyembro sa Parliament, walo ang abogado, duha ang enhinyero, ug duha lamang ang babaye.
Lakip sa mga napili si Abunawas Maslamama isip senior minister; Naguib Sinarimbo sa batakang, taas ug teknikal nga edukasyon; Jordan Bayam sa interior ug local government; Akmad Brahim sa environment ug energy; Rashdi Adiong sa human settlement; Ishak Mastura sa agrikultura, pangisda ug agrarian reform; ug Jo Genna Jover sa Indigenous people’s affairs.
Napili usab si Abdullah Cusain isip Cabinet secretary, Duque Kadatuan isip Bangsamoro attorney general, ug Alirakim Munder, Jimael Salam Salliman, Jomar Midtimbang, Kitem Kadatuan Jr., Faizal Padate, Ubaida Pacasem, Hanie Bud, Termizie Masahud ug Basir Ibrahim alang sa nagkadaiyang ministeryo sa rehiyonal nga gobyerno.
Samtang, si Laisa Alamia ang mangulo sa Bangsamoro Planning and Development Authority.
Matod ni Macacua, motabang ang mga napili sa pagdumala sa Bangsamoro Government subay sa moral governance nga gipasiugda sa kanhi interim Chief Minister Ahod Balawag Ebrahim.
Gipili ang mga opisyal human sa pagsusi sa ilang kapasidad, integridad, kasinatian ug abilidad sa pagpangulo, lakip ang ilang pasalig sa adyenda sa bag-ong administrasyon.
