DAVAO CITY – Gipasabot sa mga opisyal sa Sta. Cruz Tourism Office kung nganong ginadid-an nila nga magdala ug sud-an nga karne ang pipila ka mga climbers nga musaka sa Mt. Apo nga musubay sa Sta. Cruz Trail.
Sumala pa kang Julius Paner, senior tourism operations officer sa Sta. Cruz,nga kinahanglan hugtanon nga idili ang pagdala, pagluto ug pag-serve ug mga pork-related menu panahon nga musaka kini arun malikayan ang kontaminasyon sa African swine fever (ASF) ngadto sa Philippine Warty Pig population nga nanimuyo sa Mt. Apo Natural Park.
Kahinumduman nga bag-ohay lamang nakit-an ang endemic Sus Philippensis o Philippine Warty Pig atol sa gipahigayon nga surveillance ug monitoring sa mga personahe Department of Environment and Natural Resources 11 (DENR 11) sa lugar.
Gitataw ni Paner nga ang ASF ang nagpabilin karun nga bahad sa Davao Region nga mihatud ug grabe nga kadaut sa swine industry sa milabay nga mga katuigan hinungdan nga ginadili ang mga sud-an nga karne sa mga climbers isip epektibo nga pamaagi arun nga malikayan ang ASF sulod sa Mt. Apo Natural Park.
Gitino sab ni Paner nga usa pa lamang ka pahimangno ang nahisgutan nga lakang ug dili pa kini Protected Area Management Board (PAMB) Resolution ug dili sab kini municipal ordinance.
