Magdesisyon karong adlawng Lunes, Hulyo 20, 2026 ang Senate Impeachment Court kung aprobahan ba ang mosyon sa prosekusyon nga magpagawas og subpoena aron makuha ang bank ug tax records ni Vice President Sara Duterte ug sa iyang bana nga si Atty. Manases Carpio.
Gipadayag sa impeachment court nga tun-an una sa mga senator-judges ang maong mosyon human mapaminaw ang mga argumento sa prosekusyon ug depensa.
Sa caucus nga gihimo kaniadtong Biyernes, Hulyo 17, 2026 gihisgutan sa mga senador ang hangyo sa prosekusyon, samtang matud pa ni Impeachment Court Presiding Officer Francis Escudero, kinahanglan pa kining susihon pag-ayo tungod kay wala pa mahuman og basa sa tanang senador ang mga memorandum nga gisumite sa duha ka kampo.
Sumala ni Senate Impeachment Court Spokesperson Atty. Reginald Tongol, ang mga senador lamang nga motambong sa sesyon ang adunay katungod sa pagboto sa mosyon.
Matud pa niya, labing menos 11 ka boto ang gikinahanglan aron mapasar ang maong mosyon.
Samtang, naglaom ang House prosecution team nga paboran sa impeachment court ang ilang gihangyo.
Gikanayon ni Atty. Benjamin Tolosa Jr., tigpamaba sa prosecution panel, nga lig-on ang ilang legal nga basehan sa pagpangayo nga isumite ang maong mga dokumento.
Gipasiugda usab niya nga ang impeachment proceedings usa sa mga eksepsyon sa bank secrecy laws, busa mahimo kining i-sumite ang mga rekord isip kabahin sa pagdungog sa impeachment trial.
