Gipuna ni Senador Imee Marcos ang dugay nang wala magamit nga mga irrigation project sa National Irrigation Administration o NIA atol sa deliberasyon alang sa gisugyot nga 2027 budget sa ahensya sa Kongreso.
Konektado kini sa report sa Commission on Audit o COA kalabot sa mga patubig nga wala magamit ug mikobre og kapin 46 ka ektarya sa nasod. Tungod niini, gipangayo ni Marcos sa ahensya ang klaro nga plano ug tukmang panahon alang sa pag-ayo sa mga nadaot nga pasilidad.
Gipatin-aw ni NIA Administrator Eduardo Guillen nga nadaot ang maong mga proyekto tungod sa mga kalamidad ug nalangan ang pag-ayo niini tungod sa kawalay Quick Response Fund o QRF sa ahensya.
Gisupak ni Marcos ang maong rason ug matud pa niya, adunay pondo ang NIA alang sa pagmentinar ug pag-ayo sa mga proyekto pinaagi sa Maintenance and Other Operating Expenses o MOOE.
Sa kasamtangan, gipahibalo sa NIA nga nagpadayon ang pag-ayo sa mga proyekto aron magamit pag-usab sa mga mag-uuma sa nagkadaiyang rehiyon.
Dugang pa niini, gipapasa usab ni Marcos sa NIA ug COA ang kompletong report ug opisyal nga mga dokumento kalabot sa kahimtang sa maong irrigation system.
Gipuna usab sa senador ang giingong dili pagsunod sa pipila ka regional office sa NIA sa Procurement Law, nga dugay ng giingong problema sa ahensya ug mahimong mosangpot sa laing matang sa scam, sama sa mga isyu sa flood control projects.
