Mipahayag si Senator-Judge Alan Peter Cayetano nga andam siyang atubangon ang umaabot nga imbestigasyon sa National Bureau of Investigation (NBI) kalabot sa giingong mga iregularidad sa 2019 Southeast Asian (SEA) Games nga gipahigayon sa Pilipinas.
Sa pagdungog kagahapong adlawa Hulyo 15,2026 giingon ni Cayetano nga wala siya mahadlok sa mga alegasyon nga gipasangil batok kaniya.
Matod pa, wala na siyay laing kapilian kondili panalipdan ang iyang kaugalingon bisan pa og mausab ang sitwasyon. Dugang pa niini, kung tinuod adunay anomalya, siya mismo ang unang masuko.
Kahinumdoman nga giimbestigahan sa NBI ang giingong mga iregularidad sa paggamit sa pondo alang sa sports complex sa New Clark City, Tarlac nga gigamit sa mga atleta atol sa 2019 SEA Games.
Sumala ni NBI Director Melvin Matibag, nakadawat sila og impormasyon nga adunay bilyon-bilyong pisong pondo nga nalambigit sa proyekto nga wala pa kuno ma-liquidate.
Migawas usab ang alegasyon nga adunay pribadong kompanya nga nakadawat og gibanabana nga ₱10 bilyong bayad nga walay gipahigayong bidding pinaagi kuno sa congressional insertions.
Gipahibalo usab sa NBI nga ilang susihon pag-usab ang kontrobersyal nga SEA Games cauldron isip kabahin sa ilang imbestigasyon.
Samtang, gikuwestiyon ni Senadora Pia Cayetano ang giingong pressure ug intimidation nga giatubang sa iyang igsuon.
Sa pagkakaron, wala pa’y pahayag ang NBI Director kabahin sa mga gipahayag sa mag igsuong Cayetano.
